يارفيقي

يارفيقي كان لك حق وعنيه
والله ان الضن فيني مايخيب

والله الا اجيك وعزومي قويه
بالشدايد لك رفيقا يستجيب

للخوي بالقلب حب ومقدريه
دام فعله طيب ورايه صويب

وكان فعله شين واموره خفيه
 هذي مشكلته ولاني له صحيب

ماعليه من مساعيه الدنيه
ماهو اخوي ولا هو عم ولا نسيب

كل منا له حدود وله هويه
ولاتعجب مابها شيئا عجيب

هو له اللي له  واللي لي ليه
وكل منا له جهود وله نصيب

وكل ربعي بالغلا عندي سويه
غير من قصر بضيفه والقريب

حنا رجالا نتبع اطباع وسجيه
نحفظ الجيره ونقضي للطليب

نعشق الطيب ولو من اي سميه
ونكره المفتن ولو قالوا حبيب

طبعنا معروف طيب ومرجلبه
محتمينه بالشباب وبالمشيب

ان عطينا مال نجزل بالعطيه
وان ضربنا بسيف مضرابه عطيب

ومن تجمل نشكره في كل هيه
ومن تردى مانشدنا لو يغيب

ومن يعامل صاحبه في سؤ نيه
مانطاوع له وربه له حسيب

نستمع لاهل المكارم والحميه
ونتبع خطاهم ولو دربه صعيب

وااا هني اللي توفق  و هنيه
وسيرته عطره بلا ذنب وحريب

الحظيظ اللي تجمل مع خوبه
واستطاع الصبر بالظرف العصيب

طالبك ياالله يارب البريه
تغفر اخطانا وتستر كل عيب


شعر محمد الريضه الشراري